田園犬舍 - 游泳訓練第二課

8月19日

今日上第二堂的游泳訓練班, 我同主人一心諗住佢地兩個上星期先游過一次, 今日會好叻, 點知去到田園, 一落水, 佢兩個竟然比第一次仲驚. 聰聰直情驚到在淺水區行都唔肯行, 只係喺度嗚嗚嗚. 思思都係... >.<!

 

教練 Eric 話細狗仔都係咁架. 游多幾次就唔會驚架喇. 媽咪見到佢地震到咁, 心都實埋. 喺度諗, 游埋呢次唔好游喇...

教練好似識得讀心術咁, 同我地講: 

"千祈唔好放棄呀, 游三四次左右就會好好多架喇. 

你要記住, 

佢地一定唔會明白你係為佢好的, 

佢地一定會唔中意你以為你整古佢. 

但係, 你要知道你點解要咁, 

就係為咗佢地的健康著想呀."

媽咪一路聽一路諗...

----------

其實思思佢係肯游的. 而聰聰呢, 對眼一見到我同主人, 佢就會喪"發水". 所以, 後來只可以由教練陪佢練習. 因為佢見唔到我地就會冷靜啲, 集中啲.

咁啱嗰日同埸仲有兩隻嗲利. 一隻好叻自己游來游去. 一隻就同聰聰地一樣, 驚到係咁喺度震. 主人同叻叻嗲利的爸爸傾計, 原來叻叻嗲利腳腳都有事. 佢初初嗰幾堂都好似聰聰地咁. 但游咗幾次後, 習慣咗, 而家就開始鍾意喇, 而腳腳都好番好多添. 睇到面前呢個例子, 我地就放心番啲.

游咗幾個字之後, 思思就開始冇咁驚, 仲可以除救生衣自己游添! ^^

見佢地游游下又有啲進展, 咁我地就決定下星期  (8月25日) 再同佢地去啦. 等佢地仲有游水的記憶. 快啲可以學識咁就唔使咁驚喇! 

---------

8月20日UPDATE: 因為 田園犬舍被迫遷, 佢地好短時間之內要搞新舖. 所以店主塈 Eric 教練唔可以再教佢地兩個游水喇, 直至十月新舖開張為止. 我同主人商量過, 決定唔可以因為咁唔游, 但如果冇 ERIC 咁我地唔使過海喇. 所以今個星期就決定去試西環近啲的泳池. 如果可以的, 第時都可以留在這裡練水啦.

上文 : 田園犬舍 - 游泳訓練第一課
下文 : 愛寵店- 游泳訓練第三課