田園犬舍 - 游泳訓練第一課

8月12日

今日係游泳訓練班的第一日. 

我同主人都好緊張, 一早就準備好晒一切用品. 除咗帶咗抹身的毛巾之外, 仲有便利雨衣 (上次去視察時, 見到個個媽媽都著住), 更換的 T 恤; 當然還有大少同大小姐的毛巾玩具同零食啦!!

食早餐的時候, 見到電視報導員話太空人過咗嚟山頂玩. 咁我地就好老定咁諗 "好囉, 佢地一早過咗海, 咁即係今朝紅隧唔會被封, 咁就唔會影響我地十一點幾過九龍的大計喇! " ...

...點知話口未完, 報導員話, 太空人十一點半會返過去尖沙咀玩!!! .... ...."吓?! 咁大鑊?? 咁佢我地同佢地咪撞晒時間?? 咁我地點過海呀??" >.<!!

終於, 的士司機分咐我地要行東隧, 話呢個環境, 冇車會行紅隧架喇... 不過, 原來從屋企出發, 行東隧去田園犬舍係好爽的! 幾乎全程高速公路, 極少燈位! 

亦因為咁, 我地早咗半個鐘去到. 去到的時候, 犬舍都未開門...

犬舍的人好好呀, 見我地二人抱住大少同大小姐喺出面等, 提早咗少少開門俾我地入咗去先...畢竟都有啲太陽, 正午時份, 晒住佢地兩個都幾熱架. 犬舍咁貼心, 我同主人都讚! ^_^

入去坐咗一陣, 就有兩個好可愛的女仔走過來, 抱走咗大少同大小姐. 因為入泳池之前, 所有狗狗都要沖一沖身先, 咁起碼唔會令啲池水太污糟. 都好吖! ^_^

----------

沖完身, 第一件事, 著返件救生衣先! 安全第一嘛! ^^

訓練員 Eric 首先了解咗佢地兩個的年齡同身體狀況之後, 

就俾大少適應一下落水的感覺. 

主人就在池邊扶住大小姐.

大少以前喺沙灘都叫做落過水. 不過就超驚. 事隔多年, 佢一啲都冇變過. 一落水, 就喪拍水面, 搞到池邊所有的人全身都濕晒. 一去返腳仔掂地的地方, 就狂吠閙爆我地! >.<!

大小姐呢, 就應該係生平第一次落水喇. 佢不嬲都蛇"QUER", 落水唔掂地就更加喇. 就好似佢第一次跑草地咁, 完全唔敢郁, "啜" 實池邊不特止, 仲配上好淒厲的哀鳴聲, 真係聞者傷心, 聽者流淚,... 肉赤到我同主人呢.... 

如果唔係為佢地長遠的健康著想, 我地一定即刻帶佢走呀~!! T__T

不過, 大小姐的適應能力特別強. 佢雖然仲係有啲驚. 但係, 好快已經可以自己扒下扒下咁向前游喇. 慢慢, 我地企佢對面岸, 佢仲識得向住我地轉彎咁游(浮)過嚟添呀! ^^

下面呢段片就係完場時的progress 喇. 夠鐘時, 佢地已經可以自己轉彎.

目標當然係走返嚟我地度啦~ 

寶貝啊! 你地好叻呀! 我為你地而驕傲呀!! \^0^/

 

補充資料: 

• 一節課堂四十五分鐘. 每次游五分鐘左右佢地就會休息一下先再游. 
• 教練 Eric 話, 細狗同大狗對於游水的喜好係完全唔同的. 細狗係會好驚同好震的. 所以要俾佢地慢慢適應一下水的阻力同埋浮力. 千萬唔好掟佢地落水, 又唔好用救生衣抽返佢地上嚟, 因為咁樣佢地會唔開心 / 唔舒服, 咁令佢地更加唔鍾意游水
• 教練仲話, 游水對於狗狗來說, 係對肌肉同骨格的緞鍊. 可以減低佢地老咗會退化至不能走動的情況. 如果到老咗出現咗問題先處理的話可能就會手尾長了. 所以, 狗狗如果能夠在兩歲就開始間中游下水, 就可以令佢地唔會咁驚水同老咗肢體狀況好啲架

下文: 田園犬舍 - 游泳訓練第二課