寵物的復健治療

早前，跟大家分享過一些行動不便的寵物的照顧方法。今天想再和大家分享，其實現今社會，除了針灸、艾灸、游泳、慢行，及藥物之外，寵物復健治療也是一個很好的方法，而且市面上，也有很多專業的寵物物理治療師，可以為行動不便的寵物進行一些物理治療，幫助他們復健。

我們發現，很多時候，由於主人們因為未接觸過寵物復健治療的資訊，因而卻步。

首先，我今天想為大家分享兩段短片，是我早前上門為一位朋友的貓貓做復健治療的結果。希望增加大家對物理治療及復健治療的了解。

朋友的貓貓突然癱瘓了，看過醫生做過全面的身體檢查、X 光造影也沒有發現異樣，感覺貓貓沒有明顯的痛楚，就只是後肢突然完全沒有力量。身體其他功能都是很好的，前肢也很強壯有力。

他們向我查詢，我就試試每星期為貓貓上門做一次復健治療。以下短片，就是貓貓在一個半月後慢慢重拾後肢力量的結果。

寵物的復健治療，就跟人的一樣，需要持之以恆，也需要配合在家的適當活動及按摩。下面我有介紹一些我所知道在香港有物理治療服務的地方，大家不妨查詢一下啊~

港島區：HEAL Animal Wellness and Rehabilitation

九龍區：西九龍動物醫院-動物物理治療中心 Kowloon West Animal Hospital-Animal Physiotherapy Center

新界區：Raymond Mak Animal Physiotherapy

以上的都是我所知的一些診所資料，朋友狗狗並沒有收取任何廣告費用啊~ 如果大家有其他好的推介，都不妨告訴我，讓我可以補充一下~

如果對寵物的復健治療有任何其他查詢，都可以向我查詢啊~

👇 最後，想跟大家更新一下，我的 Facebook 面書網頁 也已經開通了 👇

朋友狗狗加油站

👆 那一邊除了會上載這邊的文章之外 👆

也會有一些軟性的、娛樂性的資訊跟大家分享

希望大家多多支持

去 "讚好" 及 "追蹤" 並加到 "喜愛" 清單，

🙏也請分享給你們的朋友啊🙏

~💕💕 多謝大家一直支持朋友狗狗啊~~💕💕 

狗狗艾灸

轉眼間，我地 ｢阿部聰｣ 已經頭頭尾尾 針灸 咗十一次喇。眼見佢的活動能力愈來愈高，發忟噌時的紮紮跳能力亦愈來愈強。我地真係好開心，好滿足~ ^0^

上星期，同佢地去咗 DOCTOR PET 的狗狗慈善步行日，本來都諗住主要係幫 ｢思思奈美｣ 放電的，打算係要揹 ｢阿部聰｣ 揹足全場的。但係，當日的佢，竟然可以同我地一齊行足成個鐘頭先開始放慢腳步。 :P

雖然係咁，但由於最近的天氣時好時壞，而且相對濕度都經常超過百分之九十。嗰幾日，｢阿部聰｣ 的骨痛又會嚴重啲，步履又會蹣跚啲。上星期針灸的時候，同醫護人員講起，佢地就叫我試下同阿部聰用 ｢艾棒｣ 轆下，舒緩一下佢的痛楚。

咁，究竟，艾棒係咩嚟架呢？

轆轆下，又有咩用架呢？

點做架呢？

－－－－－－－－－－

好啦~

拿，金色呢支就係 ｢艾棒｣ 喇。上面一排三支裝，一盒十排的，就是 ｢艾草條｣。

做法就係將 ｢艾草條｣ 好似點香燭咁點著佢，放入 ｢艾棒｣ 入面。等 ｢艾草條｣ 的煙，從 ｢艾棒｣ 比較粗那一邊，當中的孔之中透出來，以 ｢艾草｣ 的煙燻，加上 ｢艾棒｣ 的熱力，在患處轆轆。每次大約十分鐘左右。。。

其實轆緊的時候，佢地已經好舒服好放鬆咗~

轆完之後，就係咁瞓到好稔 (就好似我地去做按摩咁)~

見到佢地咁舒服，瞓得咁稔，就真係好有滿足感喇~ \^0^/ 

不過，一定要注意運用的時候，要不時測試 ｢艾棒｣ 的熱力。因為佢的金屬表面好快會變得好熱，如果我地人類自己掂到，分分鐘會LARK到生水泡。雖然狗狗有毛髮隔熱，我地都要好小心，唔好灼傷佢地。如果真係太熱，可以用毛巾包住支 ｢艾棒｣ 先轆。

我自己就建議唔好一次過燃點得太耐，十分鐘左右就熄一熄，等支 ｢艾棒｣ 回復室溫，才再燃點。如果有幾隻狗狗要做，我自己就會分開嚟做。做完一次，弄熄了，讓艾棒先回復室溫，才再燃點幫第二個狗狗做。 ^^

----------

做完了，覺得WORK 噃！求知慾旺盛的我，就好想知多一點 ｢艾灸｣ 的知識，所以就上網查了一下。以下係一啲關於 ｢艾灸｣ 的基本資料~ ^^

首先，「艾灸」是一種較溫和的療法，源自三千多年前的中國傳統自然療法。原理是利用燃燒「艾草」的煙薰灸穴位，借灸火的熱力透入肌膚，通過經絡的作用，以溫通氣血，達到治病和保健目的的一種外治方法。它屬於溫通經絡，「無入侵性，非藥物性」的療法，適合冬天一些虛寒的症狀，以及腸胃不適、關節痠痛、腰痠背痛、風濕痛等的痛症。



｢艾草條｣ 是由 ｢艾葉｣ 精製成的條狀藥艾。｢ 艾葉 ｣ 含有大量的良質葉綠素、膳食纖維、以及豐富的維他命 A、B1、B2、C與及礦物質的鐵、鈣、燐等。

其實，｢艾灸｣ 本身係人類的中醫療法。所以，｢艾棒｣ 係同人用的一樣，｢艾草條｣ 也是。但是，如果有關人類病症的灸法及調理等問題，朋友狗狗就不敢涉獵喇。　:P

資料來源:
1. 一步一腳印
2. 高雄市菩提堂

3. 農本方

上一篇：　狗狗針灸（四－六）

狗狗針炙 (四-六)

過去幾個星期，媽媽同主人工作都開始好忙喇。但係我的 針炙計劃係唔可以停的! @.@!!

月頭的時候，我地返去嚴醫生度打咗一支骨針，維持我的軟骨組織的功能。其餘的每個星期日，我地都會去針炙醫生度針一次。轉眼之間，到今日我地已經大大話話針咗六次喇~!! ^_^

每個星期針炙之前，針炙醫生會先檢視一下我的狀況。然後同媽咪傾下有沒有進步。

其實我呢幾個星期的活動能力好咗好多架喇! 

喺屋企有時我會 靜雞雞跳跳下，試下自己的腳腳係咪真係有力啲。。。嘻嘻。。。

而有時出街街的時候，會趁媽咪睇唔到，同妹妹一齊賽跑步架! 哇哈哈! 

不過如果俾媽咪同主人見到，佢地就會閙我架喇! >.<!

有時，我喺屋企尿尿的時候，會試下"第"高隻腳。有時都得架，不過唔係次次都得。慢慢再好啲應該就得架喇! 我對自己好有信心架!

 

不過因為我的腳腳的肌肉仲未好有力，所以仲會成日震震下。所有而家，佢地成日叫我做 "猫王"。其實我冇事架! >.<!  醫生都係咁講架。

呢兩個星期，喺醫生度見到另一隻莎莎，叫做"阿DEE"。 佢兩隻後腳都經已麻痺晒郁唔到架喇，好可憐呀~ 不過佢見到我同妹妹都好開心，成日會興奮到尿尿而俾佢媽媽閙。行唔到都會用兩隻手手爬過來同我同妹妹玩。我地就會走過去同佢打招呼。其實佢好可愛架! 媽咪同佢個爸爸講叫佢俾啲耐性針下啦，因為真係有用架! 希望佢爸爸媽媽唔好放棄佢啦~ 阿DEE你要加油呀!! *_*

仲有一個好消息呀! 

尋日醫生話我進展良好，

可以開始唔使再針得咁密喇!

之後可以兩個星期先針一次! 跟住慢慢就可以三個星期，四個星期咁! 好嘢! \^0^/

所以，喺度真係要忠告所有爸爸媽媽， 

如果發現自己的孩子走路開始有問題時，

千祈要盡快求診呀! 

唔好等到我地行唔到先帶我地去睇醫生呀~~ ^^

上一篇：狗狗針灸（三）
下一篇：狗狗艾灸

狗狗針炙(三)

[媽媽口中的話]

上星期一針炙完之後，過兩日聰聰對腳腳又正常返喇，行得走得。咁我同主人就冇咁擔心，打算等佢感冒再好番啲先至同佢返去打骨針。

等醫生一放完假，今日先拿拿臨同佢去針多一嘢先。WEEKEND先再同佢返去打番支骨針。

今次係第三次針炙喇！

一收工返到屋企，換件衫又即刻揹返條揹帶同佢出去喇。

因為醫生LAST BOOKING 係七點呀!! >.<!!

如果你地見過一個傻婆，背上一條橙色的揹帶，上面有一個頭岳岳黑色的英俊小生的。。。

無錯！就係我地喇！\^0^/ 

[聰聰的心裡話]

一月一日醫生放咗一日假，搞到今晚診所好多人呀！我地已經排到 LAST BOOKING 架啦，都仲有三隻狗狗等緊... >.<... 不過咁有咁好，因為咁我就可以等埋主人放工嚟陪我針炙喇~~ ^^

醫生首先檢查我的眼仔。佢話我的眼仔已經好番好多喇，不過就千叮萬囑媽咪乾眼症係唔會斷尾架，叫佢千祈唔好停藥膏呀！要 KEEP 住繼續幫我滴眼呀！

靜靜雞話你地知吖~  其實我好鍾意媽咪幫我滴眼架！因為佢會抱住我，攬到我好實，然後好細心咁幫我用棉花抹乾淨我的眼，再滴眼膏。嗰個時間，我會好乖，唔會郁身郁勢，唔會咬佢。因為滴眼同梳毛唔同，好舒服架~~~ \^0^/

跟住醫生又幫我檢查下我的手手腳腳，聽下心聽下胃咁。佢話我的感冒已經好番晒喇。心臟同胃都冇雜音，好清。又幫我拉下手拉下腳咁，又試下我的反射行為咁。我的左腳已經可以好快咁回彈喇，不過右腳都仲係唔聽話。。。

好啦！施針喇！

今日醫生好重手呀！佢話我隻右腳仲有啲慢，所以今日喺腳腳加咗兩支針。總共施咗十八支呀~！ >.<!!

唔知點解今日醫生由我的屁股吉起。因為後面施咗十支針，搞到我個屁股開花呀！好痛呀！我要咬姑娘！我要咬醫生！>.<!!

今日主人嚟咗，份外覺得痛！我要望住主人呀！主人！

主人同媽咪同盡辦法分散我注意力，又同我傾計啦，又同我講妹妹一個喺屋企發脾氣，又話今晚煮咗瓜瓜俾我食啦，咁。。。

後來，媽咪要割愛拆咗主人新買俾佢的莎莎鎖匙扣來引我。。。我終於都捱過咗喇！~~~  _/\_

[媽媽又說話]

其實今日聰聰針炙的時候反抗好大，唔知的仲以為佢好痛。但其實聽得出佢係發脾氣發忟噌的聲嚟的。可能因為今日大爺佢巴閉啦，主人都過嚟陪佢，所以咪惡囖。平時日頭嚟的時候，得我一個喺度，佢敢發我脾氣？ 哼！

後來返到屋企一放佢低佢，見佢一支箭咁衝咗入廁所。。。 

主人大叫："你見唔見到呀？"

"咩呀？"

主人："佢第起咗隻左腳尿尿呀！"

"咦！係噃！"

主人："原來真係咁犀利！咁快見效架噃！！"

----------

呢度，我要多謝醫生幫聰聰針炙，聰聰只係針咗三次，已經可見佢對骨針的依賴減輕了，活動能力加強了。呢幾日咁凍的天氣，佢都冇病發。希望 KEEP 住一直做落去的話，可以繼續幫到聰聰減輕佢的痛苦。^^

另外，我一定一定要多謝永恆的"嚴醫生"。如果唔係佢廣闊的胸懷，多次無私地建議我地去別家診所嘗試幫聰聰做針炙，我地都唔會見到佢而家可以咁靈活咁走路，同埋終於可以減低對藥物的依賴。嚴醫生真係一個真正用心為小動物想盡好辦法的一個好醫生。好多謝妳~ \^0^/



上一篇：狗狗針灸（二）
下一篇：狗狗針灸（四－六）

狗狗針炙(二)

今日, 又帶聰聰去針炙喇. 

星期五開始, 聰聰的骨痛又嚴重番喇. 其中一個原因係因為一號打完骨針之後, 已經三個星期喇.  藥力已經過晒喇... 上兩個月都係咁, 差唔多三個星期的時候佢就開始企唔到成餐飯, 食食下要蹲喺度. 又冇胃口食. 又唔願行. 咁啱, 呢幾日天氣又開始轉冷. 令佢的肌肉更加收縮, 於是就行得更加辛苦喇... T___T

今朝得十度. 幫佢著返件褸仔, 再 "痴"兩個暖包, 就同佢出醫生度喇. 喺屋企就好辛苦咁, 但係去到醫生度, 就死牚!! 又要落地行!! 又要周圍聞!!!  

明明係唔舒服家嘛, 行兩行咪又屈晒對後腳, 
冇晒力咁囉... >.<!







今朝醫生有急症, 所以就等咗一陣. 行到咁上下真係行唔到喇, 抱返起佢, 唔俾行喇!! >.<!!

陰公豬個樣真係冇晒心機架... >.<!!

好喇, 醫生得閒喇! 到我地喇!!

今日醫生幫佢檢查時, 佢好乖. 冇再好似上次咁咬醫生喇. 唔知係因為冇乜力定係咩啦, 全程都好乖. 醫生首先同佢檢查下佢後腳的回復反應. 果然比上次針之前好咗啲噃. 兩隻腳板 都有番反應會回復返原位. 不過大脾都仲係冇力.

今日聰聰真係好乖呀, 全程都冇郁過, 醫生落針共一十六支, 由背脊到後腳, 每一針吉落去佢都冇郁. 冇反轉頭怒睥醫生, 又冇MARK大口想咬護士. 

醫生話背脊最前嗰個兩支應該係好痛的, 仲有係上次吉的時候都有縮縮下的後腳同

PAT PAT嗰幾支, 今日都好定咁由得醫生吉. 

又冇好似上次咁運內功迫返啲針出嚟. 所以今日好順利~   ^^

好喇, 針完, 艾完, 又係收成的時候喇! 放返佢落地行的時候, 見佢真係即刻健步如飛, 行得快咗又輕咗. 唔通針炙真係咁犀利? \^0^/

不過, 聰聰要食藥喇. 
因為佢有啲冷親, 要食抗生素... 
呢幾日又眼仔矇矇, 醫生發現佢患上咗早期的乾眼症, 又要開始滴眼藥水... :'(

----------

聰聰返到屋企又好攰咁, 而家又瞓咗喇. 

呢幾日見到佢咁辛苦的樣, 都不知幾肉赤. 

不過正如醫生所講, 好彩佢患的都只不過係小毛病.

雖然佢已經十一歲, 

但係而家的心肺功能, 應該都有排佢捱呀! ^^

阿仔, 要快啲好返呀! 媽咪好掛住你好曵嗰個樣呀~ ^^ 

上一篇: 狗狗針炙(一)
下一篇：狗狗針灸（三）

狗狗針灸（一）

末日前的日子係特別忙的！
星期一同聰聰去完針灸之後，一直都未有時間上嚟報導一下佢的"第一次"。

----------

自從大半年前聰聰的骨刺惡化之後，我同主人就一直周圍打聽，希望搵到一啲方法可以減慢佢軟骨退化的問題，可以等佢打針唔使打得咁密，同埋唔使每個月都有幾日咁奄痛。

之前，同佢試過游水，又試過食加強版的葡萄糖鞍補充劑，都有見過傳聞中嗰一個 "好有名的動物傳心針灸獸醫師"架。 

不過，嗰一個 "好有名的動物傳心針灸獸醫師" 氣焰有啲囂張，見面的十多分鐘主要都係用來批評其他的獸醫，但係又唔會幫我聰聰斷診噃。另外，由於佢返診所工作的時間真係好有限，等等咁的種種因素，令到我地一家人好難配合倒佢。

所以，試過一次好難 BOOK 的但冇得斷症冇得治療冇得落針但就要俾診金的一個APPOINTMENT之後，我地就冇再返去喇。

事隔都有成年幾喇，今次我地就去見另一位醫生。呢位醫生係朋友介紹的。朋友話好多狗狗都睇過，評語都好正面又唔遠。咁我地就姑且去試下啦！

呢個醫生見到我地，首先叫聰聰落地行下俾佢睇。佢話想觀察下聰聰行路的情況。不過，可能因為打咗骨針都只係兩個星期多啲，醫生話見聰聰，

"都唔係行得好差咋噃~"

拿拿拿，你地見到啦，(----->)
唔係作大架。佢嗰日真係"好冇事"，周圍共，周圍聞。

唉，冇法啦，話晒初嚟報到，新仔嘛，點都要嚟"拜下四角"先嘅~ :p

好喇~ "肺" 話少講喇，醫生話，

"好喇, 入嚟喇！檢查下先啦~"

我地聰聰真係唔係善男信女架！一上枱，醫生一摸，聰聰 MARK 大口就 ------- "[  ！]"

醫生: "哇!"   

我: "係呀!"

醫生: "咬呀?"

我: "咬架!"

醫生: "哦~ 好好, 唔怕唔怕. 知道就得喇~ 即係唔係我的問題！"

----------

基本的身體檢查通過咗喇 (^-^)，開始施針喇！ 

初時我都有啲擔心架，檢查都咬，咁... 吉針點算呢...？

我見助手好熟練咁將聰聰放咗上 "鞍馬" 之後，醫生就開始施針喇！
(<---我叫呢舊嘢做鞍馬因為我覺得佢好似) 

首先搵返聰聰生骨刺嗰幾節，見醫生一面數一面施針。背脊施咗八支針，之後就插電。 

出奇地，聰聰全程都好乖呀。冇郁身郁勢，冇咬冇吠！不過醫生話史納莎基本上都係屬於比較容易吉的。但聰聰乖到呢，連醫生都話估唔到會乖得咁緊要！哈！\^0^/

真難得!

我問準咗醫生，醫生話可以影相，咁我就一面睇住佢吉針，一面SEND 相俾主人睇。

----------

正所謂，打完心口打背脊；

吉完背脊，就緊係吉腳腳啦~

吉腳腳時，可能真係有啲痛喇。聰聰佢就有啲反抗喇。不過，都係見佢踢咗幾下啫，好快，醫生同助手就捉返住佢，HOLD 住喇。

HOLD 定定的時候，可能電得有啲熱。隔咗一陣，聰聰就開始將背脊啲針一支一支咁迫返出嚟，好似以前武俠片啲人迫啲毒針出嚟咁，都幾好笑。^^

見醫生插返一支入去，佢又迫返一支出嚟；插返一支入去，又迫返一支出嚟；如是者來來回回咗幾次，連醫生都忍唔住笑住叫佢，"唔好迫返啲針出嚟啦!"

醫生一面施針，就一面講，

"史納莎呢個品種，好多老咗都會有呢個骨頭的毛病架。不過，佢地點差都唔會差到好似西施嗰啲咁爬咗喺度唔郁得的。最多都係蹲喺度或者係行路拐拐下咁。針下啦，情況會好啲的，會行得好啲的..."

見佢背脊加埋腳腳大大話話都吉咗十六支針，我將啲相SEND 俾返緊工的主人睇，主人睇到都好肉赤呀，仲問我有冇喊? >.<!

"唉！聰聰以前入幾次醫院又插喉又吊鹽水又深切治療咁，呢啲算得係咩吖~ 

我好叻呀！冇喊呀！"

電咗一陣, 醫生拿個遠紅外線燈出嚟! 

哇！真係唔簡單！勁呀仔你！

照咗一陣，醫生望望錶，見聰聰開始郁嚟郁去，縮下縮下咁，

"唔，差唔多可以拔喇!" 

醫生拿著一支黑蚊蚊的嘢，用火機燒下佢，

"咩嚟架醫生？"

"拔針之前呢，我要先幫佢做艾炙呀~" 

其實，之後醫生解釋咗俾我聽支嘢係咩嚟同埋有咩用，同埋咩叫艾炙的。不過以我的記憶能力，能夠記到呢度，其實已經好叻架喇。我的MEMORY 已經 FULL 咗喇... >.<！

艾炙就係呢兩張相的嘢喇。見醫生燒熱咗支嘢之後，放上去支針度"慶"一陣，就可以拔針架喇！

成個療程總共一個小時。成個鐘頭，聰聰都伏喺個 "鞍馬" 度，好乖，又伏得好定。我心諗，唔通其實個 "鞍馬" 好舒服嘅?




做完療程之後，醫生再幫聰聰測試一下佢後腳的回彈能力。果然，兩隻腳板都即刻有番反射活動噃！咁快？\^0^/

醫生話，

"聰聰的情況都唔係好差，一個星期嚟針一次都可以架喇。初時呢幾次，可能效果冇咁持久，兩三日左右你就會發覺佢好似未做咁。不過做多幾次之後，你就會發覺佢明顯會好咗，同埋持久啲架喇。到時就可以唔使嚟得咁密架喇。暫時嚟講 KEEP 住打番骨針先，到針灸的效果明顯咗之後，就可以慢慢打番梳啲啲骨針，唔使打咁密架喇~"

返到屋企，聰聰行咗幾個圈，就攰到瞓低咗喇。。。

阿仔， 
媽咪已經好叻架喇！記得醫生講的咁多嘢，仲要記到咁多日添~
所以你真係要努力呀！要快啲番，唔好成日奄痛，咁媽咪個心就唔痛架喇~ 
媽咪永遠都愛你~ \^0^/

下一篇: 狗狗針炙(二)