2012年11月22日 星期四
撰文:活力先生
欄名:關人馬事
自收養狗仔 Sunny 後，我阿活先知道，香港寵物市場遠比想像大！但成個社會，包括政府，似乎相當後知後覺，完全無政策配合。
其實，寵物市場商機無限，除可帶來無數就業機會之外，更可以賺取大量外滙。粗略估計，香港有各式寵物數十萬頭，單單養狗已達四十一萬（官方數字），加上家禽、豬牛及各式魚類，所需服務，尤其醫療，深不可測。
香港人口密度高，國際流動性強，傳染病風險特別大，但香港連一間動物醫學院都無，又點應付排山倒海嘅需要？
早幾年查史美倫領導大學撥款委員會時，小弟曾公開呼籲，請佢擦亮眼睛，認清市場大勢，咪以長官意志阻住大學搞動物醫學院。查太位高權重，當我發噏風而懶理，總之唔俾動物醫學院成立。幸而，一朝天子一朝臣，查太罔顧社會需要，否決應出現的教學領域，好在領導人始終有換屆嘅一日。新人事上台，面對客觀事實，肯定有新判斷。聽講拖咗 N 年，第一間動物醫學院終於快出現嘞，hurrah！
現今香港幾百名獸醫全都在外國受訓，全屬富家子弟。點解？老友，去澳洲讀獸醫學，四十萬港元一年㗎，有乜法子唔變「貴族學系」？遲吓好嘞，中下層嘅年輕人都可以喺本地大學讀，學費十分之一已搞掂，畢業後，可以服務香港及珠三角一帶。到時帶 Sunny 仔去睇醫生，怕且收費都無咁肉痛咯啩？
沒有留言:
發佈留言