因為 CAF 取消咗週六的 DOG WALK, 咁我同主人就決定嗰日凈係拎三袋物資入去先, 然後, 再返出嚟接埋 聰聰 同 思思 去參加 反繁殖場牌照集會.去到 CAF, 我地放低物資之後, 就入咗去探 Dudu. 小狗的屋仔入面, 有成十幾隻細種狗. 呢班小朋友, 個個都係被人遺棄的, 唔係年紀大, 就係因為有病, 有幾隻仲係明顯見到有白內障的添. 不過佢地都好開心, 見到有人去陪佢地玩個個都爭住要按摩.
可惜... 因為我地要趕返出去參加 反繁殖場牌照集會 所以要趕住走... 我地唯有好依依不捨咁離開...
其實, 去到 CAF, 見到佢地的運作時, 講真, 我都有一啲意料之外.
但係, 可能因為我之前學過寵物美容, 接觸過比較污糟的狗狗, 所以, 我並沒有太錯愕. 反而係愛整潔的主人有一啲不知所措...
不過, 我地都知道 CAF 係因為經費有限, 生活先咁艱苦. 值得開心的係, 見到的狗狗, 佢地都好開朗, 好快樂. 總算有個家, 有人錫. 點都比在外流離失所好.
只係希望自己可以有多一點時間, 多一啲去陪佢地玩, 如果可以幫佢地沖埋涼, 咁就好喇~
~~~~~~~~~~
回來後, 就拿拿臨接埋聰聰同思思趕去政總參加反繁殖場牌照的集會. 雖然我地遲咗成個鐘先去到, 但看到及聽到好多好感人的案件. 好開心同多謝大家無私的分享. 希望多啲香港人可以知道更多. 希望多一啲傳統媒體可以報導...
集會上，最記得主持人阿MARK 講的一番說話. 因為佢解決咗一個困擾咗我一段時間的問題.
老實講, 自從開始認真睇份139B 的諮詢文件之後, 兩個星期以來, 我都一直失眠. 我感嘆文件的粗製濫造, 我痛心文件的殘酷. 文件完全忽略了生命的價值及尊嚴, 竟然確認了動物生命的不值一題, 承諾延續業界的殘暴不仁. 我真的好痛心. 好氣憤. 我好憎香港. 好羞恥自己係一個香港人.
但, 另一方面, 我又在想, 究竟係唔係我想太多呢? 究竟係唔係我太堅持呢? 我一度想放棄, 放棄為牠們盡最後的努力, 放棄咁辛苦咁繼續做呢份回應文件.
當晚, 聽完大家的分享之後. 我就好似得到了明燈的指示咁. 我明白到, 原來, 我不是一個人的 (I am not alone). 原來, 我所看到的荒唐之處, NPV 及其他的志願機構也看到!
然後, MARK 再說了一句話, 令我決定繼續堅持落去:
"我地係少數的人. 但係, 咁並唔代表我地要放棄.
就正正因為我地係少數的人, 我地就更加要堅持.
因為, 如果連我地都放棄為佢地的生命爭取應有的尊嚴的時候,
怎麼辦?"
~~~~~~~~~~
當日整天都為小生命跑來跑去. 好累好累.
但係, 做完了, 去過了, 而家心安理得.
"既然決定咗要盡力為小動物發聲,
無論身邊有冇人支持, 我都要做落去!"
"唔. 好. 退. 縮!"
沒有留言:
發佈留言