寶寶們的密集式訓練已經來到第四個星期喇. 今次, 我地的訓練場所都係西環石塘咀的愛寵店.
我地 BOOK 咗五點鐘. 但係去到的時候, 仲有狗狗啱啱先落水, 所以我地要等佢游完先可以開始游... (同上星期一樣, 老闆話今日又人手唔夠, 所以安排的嘢混亂咗啲. 唔夠人手幫狗狗沖身, 幫狗狗剪指甲的哥哥又因為生手而剪耐咗, 所以就搞到遲咗... -__-! )
有咗上次的經驗, 我地今個星期決定自己幫佢兩個沖涼. 雖然辛苦啲, 但係起碼唔使驚新手哥哥會搞唔掂兩隻狗狗. 不過店主都好好, 我地游完之後, 佢由得我地兩個在狗狗沖涼區幫佢兩個沖涼同吹毛. 我地唔識開啲吹風機, 老闆娘都好主動幫我地開. 兩個加埋沖咗四十五分鐘, 仲耐過佢兩個游水的時間, 店主都冇不耐煩, 仲好有禮貌. :))
今次思思就冇上幾次咁叻喇. 佢仲好驚. 我同主人著重幫佢放開後腳游. 佢的左後腳已經開始可以爬爬下喇.
聰聰今次就有咗明顯的進步喇. 我地兩個都覺得佢已經有游水的記憶喇. 今次落水已經冇咁驚. 游咗一兩個圈, 已經可以放鬆晒手手腳腳咁游. 冇亂打亂拍喇.
游咗咁多次, 綜合了經驗及網上的資料搜集, 我地已經自己建立咗一個訓練的模式喇:-
(1) 喺愛寵店, 因為我同主人都可以落水, 咁我地就一人睇住一隻. 首先, 會慢慢放佢地落水, 托住佢地游兩三個圈, 等佢地習慣一下在水中的感覺, 同埋知道我同主人都會在旁, 等佢地建立咗信心先.
(2) 游咗大約五個圈之後, 我地就會俾佢地政埋岸休息下. 通常, 到咗岸之後, 佢地有番落地的感覺之後, 就會開始驚, 同嬲喇. 好怕再落水... 不過點都唔可以要佢地不停游家嘛... 人都唔得啦! >.<!
(3) 休息幾分鐘之後, 我同主人又會一人一隻, 帶佢地游一個圈. 之後, 就會一人同一隻企埋一邊. 然後我地唔行, 將佢兩個各自推出去. 然後, 我地各自在對面岸召喚佢地.
--> 即是, 若思思和主人企一邊, 我和聰聰企另一邊, 我就將聰聰推出, 主人就將思思推出. 然後我就召喚思思, 主人就召喚聰聰, 等佢地看到我地, 鼓勵佢地分別向我同主人游過來. 呢個方法好好. 因為佢地見到我地在前面, 就會乜驚都唔記得, 只知道向我們游過來. 可以令佢地集中地運動.
(4) 如是者, 練習五個圈左右, 就再休息...
(5) 休息後, 我地就會做重點訓練. 聰聰呢, 就用之前教練 Eric 教的方法, 左右五次做阻力練習. 而思思呢, 就捉住佢的後腳, 教佢放開後腳游.
(6) 之後, 就又休息. 又游圈咁. 今次訓練左半個鐘左右, 我地見聰聰游得好順, 就試下幫佢除救生衣喇. 不過, 發覺佢後腳因為力量唔夠, 牚唔起自己. 所以, 試咗一陣, 就幫佢著番. 始終, 我地都只係想佢活動下, 練返啲肌肉, 改善佢的骨刺問題啫, 唔係要佢游得好叻. 佢肯落水爬下爬下, 我同主人已經好安慰喇. \^0^/
而思思, 因為佢係力量型, 所以只係手手, 已經可以牚起自己游幾個塘, 所以除低救生衣都OK! :P
----------
游咗半個鐘多啲, 我地就俾佢地上水喇.
因為要佢地游足四十五分鐘其實對佢地嚟講就真好攰的...
嚟緊呢個星期, 就係第五次的訓練喇. 我同主人覺得密集式的訓練應該都夠喇, 之後, 就可以隔個星期咁游喇.
今個星期聰聰會返去嚴醫生度覆診.
希望嚴醫生見到聰聰的骨痛有改良到啦. ^^
上一篇: 愛寵店- 游泳訓練第三課
致所有99bus試行日參加者：
